من ذاكرة الحرب " عيشوا يوم معنا "

[mohamd89]

رائعة من أيام الحرب بقلم أخ فاضل
إقرأوها للنهاية ما رح تندموا :(6):

وكل يوم بنقول هادة أقوى يوم.. وأعنف يوم ..
لا بس بجد.. اليوم أعنف وأقوى يوم شفناه..كنا نشوف أغلب القصف على التلفزيون .. هلقيت صار قدامنا مباشر..
طول الليل الدنيا تضوي وتطفي.. زي الألعاب النارية..
بس العالم الألعاب النارية عندها من الأرض للسما.. إلا في غزة.. من السما للأرض..
هيهم وصلوا تل الهوى.. يعني بشيكل بكونوا عنا.. مش بشيكل ونص حتى..
أنا قاعد عالكمبيوتر.. وأهلي كلهم مجتمعين قالبين محللين عسكريين.. وعاملين غرفة عمليات مشتركة.. ومستغربين من تصرفاتي.. على أساس إنو الدنيا حرب لازم أضل قاعد ألطم..

تلت أسابيع قاعدين في الدار لا طلعة ولا نزلة.. ولا شغلة ولا مشغلة.. فش كهربا ولا ميا.. من كتر الزهق من القعدة الواحد بتحير ايش يعمل في الدار.. مرات بقعد أعد البلاط.. ومرات أكم كسرة في الستارة.. وأحياناً بقعد ألعب في الجوال (في حال كان فيه بطارية).. أو بقعد أتشغل في واحد من اخواتي..
ما علينا.. الحلو في الموضوع انه شلومو بتبين حنيته في وقت الحرب .. بقولك حفاظاً على رفاهية الشعب.. اعطونا تلت ساعات تهدئة في اليوم.. الواحد يعمل فيهم اللي بده اياه..
وأحلى ما فيهم انهم مشكلين.. يوم من الوحدة للأربعة.. ويوم من التمنية للحدعش.. ويوم من العشرة للوحدة..
وبقولك احزر الفترة تاعت بكرة واتصل على رقم تلت تمنيات اتنين صفر وواحد احمر.. بتكسب جائزة..
والله الواحد بتحير ايش يعمل في التلت ساعات .. مسافة ما يفكر وين يطلع (على أساس ضل مكان في غزة الواحد يروح عليه) بكونوا خلصوا..
اليوم قعدت أفكر أفكر ايش أعمل.. لقيت احسن اشي أعمله اني أنام.. عشان الجو بكون هدوء وفش صوت قصف (نسبياً) ..
لأنه طول الليل صوت الزنانات بخليش الواحد يعرف ينام.. الواحد بحس انه في واحد بخرق في نافوخه بمقدح..
طول ما الواحد قاعد وهوة بسمع يا صوت صاروخ قريب.. يا بعيد.. يا بحس بهزة.. وبدينا نسمع مناطق غريبة صاروا يقصفوها..
مرة مقبرة.. ومرة صالة أفراح.. ومرة عمارة سكنية.. ومرة دار مهجورة.. أو بقصفوا مكان قصفوه قبل هيك (للتأكيد)..
طبعاً في هادي المناسبة بحب أتقدم بالشكر للطيار اللي بقصف بإنه بحدف صاروخ صغير عالدار قبل ما يجيبها نصين بالصاروخ اللي بعده..
شايفين الإنسانية لوين.. وبتقولوا عنهم عاطلين.. يعني اللي ما بصيده الصاروخ الأول.. معاه خمس دقايق ينفد بجلده قبل ما يجيب أجله الصاروخ التاني..
الأعمار بيد الله.. الواحد عنده يقين انه كل شي بأمر الله.. عالرغم بإنه الواحد بطل يخاف زي أول لما يسمع صوت صاروخ..
بس إلا إنه الخوف من انه الطيار أخو الشلن تحلو دارنا في عينه ويمزعنا صاروخ بحجة الغسيل اللي عالسطح بأثر عالزنانات..
دايما بحاول أواسي حالي بالمقولة اللي بتقول "متخفش من صوت الرصاص.. لأنه الرصاصة اللي حتقتلك مش حتسمع صوتها"..
بس هالمقولة بتنطبقش عالصواريخ.. ولا ايش رأيكم..؟

أكتر اشي بكيف عليه لما يرن تلفون الدار.. بنصير نتقاتل مين يرد عالتلفون أنا واخواتي.. عشان نحكي مع الناس اللي بتصلوا من الدول العربية..
كل واحد وحظه.. يطلع الإتصال من المغرب.. الجزائر.. مصر.. ليبيا.. السعودية.. السودان.. أو يتخوزق ويطلعله واحد بقولك جيش الدفاع الاسرائيلي..
ويطلع الشب بحزرك انه يكون عندك سلاح.. أو تتعامل مع واحد من المقاومة..
بس اليوم حسيت انه فش إلا تلفونا بكل غزة.. مسكتش وهوة يرن..
- ألو السلام عليكم...
- وعليكم السلام..
- معك فلانة من ليبيا.. الله معكم.. الله ينصركم.. الله يقويكم..
- تسلمي يا حجة.. إدعولنا..
- الله ينصركم ويحفظكم..
- يلا سلام عليكم..
- وعليكم السلام..
هادي عينة من المكالمات اللي بتوصلنا.. مع انها صغيرة وفهاش رغي وطق حنك .. إلا إنها بتحسس الواحد انه مش لحاله وفي حد معاه..
ويا حبيبي لو خلال المكالمة نزل صاروخ ولا الخمسمية تاعت الأباتشي اشتغلت.. شوف العياط على التلفون .. وبدل ما هما يصيروا يواسوك ويهدوا فيك.. احنا بنصير نهدي فيهم ونسكتهم..

لأ والشغلة الجديدة اللي غايظاني قصة الفسفور.. أنا طول عمري بسمع انه الفسفور في السمك.. وإنه مفيد للشسمو.. وكل ما الواحد كان ياكل سمك.. كان يحس حاله صار يضوي من الفسفور..بس هان الوضع مختلف.. فسفور صح بخليك تضوي.. يعني أول ما تيجي عليك قذيفة فسفور.. وتهب فيك النار.. حيصير اللي يشوفك يقولك منور ياحج.. الله يلطف فينا..

طبعاً وقت الفراغ الواحد بحاول يستغله بإشي مفيد.. أنا استغليت وقتي برياضة جديدة.. وهية رياضة براميل الميا..
أول ما أفتح عنيا على طول بمارس الرياضة اليومية.. بطلع على سطح الدار بتفقد براميل الميا.. وقديش ضايل ميا.. طبعاً عن طريق الدقدقة على البرميل..
الواحد صارت أذنه موسيقية برميلية.. وصار من صوت الدقة على البرميل يعرف إذا كان فاضي ولا مليان (طبعاً هادي الكل بعرفها).. بس الجديد واللي اكتسبته مع الخبرة انه لو كان البرميل مليان أعرف أكم لتر ميا فيه..

أنا لقيت حالي لهلقيت عايش قلت أكتبلكم أحكيلكم عن وضعنا.. بكرة يمكن أكون عايش بس مش قادر أكتب.. أو مش عايش من أصلو..
إدعولنا.. إدعوا تنحل هالقصة على خير.. إدعوا للمقاومين.. إدعوا للشهدا.. إدعوا للجرحى.. إدعوا للناس الله يصبرها.. إدعوا للكل..
ونشوفكم على خير..

[ابومالك الفلسطيني]

رد: من ذاكرة الحرب " عيشوا يوم معنا "

ههههههههههههه
مشكوووووووور على قصتك اخي وبارك الله فيك يا طيب وجزاك الله كل خير قصة ممتعة جدا ومضحكة ومحزنة في نفس الوقت

:(6):

[محمود طوالبـة]

رد: من ذاكرة الحرب " عيشوا يوم معنا "

ذكريات لا شك انها حفرت في ذاكرتكم

فالحرب لا تنسى!

بوركت

[لهيب السرايا]

رد: من ذاكرة الحرب " عيشوا يوم معنا "

اجمل ما في القصة ساعات التهدئة الثلاث ..

ازمة وعدت اخي

والحمد لله على السلامة

[لأجلكم هناك]

رد: من ذاكرة الحرب " عيشوا يوم معنا "

سبحان الله ..
قبل ثلاثة أعوام كنا غارقين في صمت الرعب و صراخ الموت ؟؟
إنها الحياة تفقد منها من تعشق و يبقى لك من يغدر
إنه الموت أجله عند المولى و نهايته تكون بحسن مطلبك
اللهم ووفقنا لما به من كل خير
و سلمنا من كل شر
و طمئن أمتنا بخلاص المر
و أصبح كل أسير و طريد حر

[حفيد طيبة]

رد: من ذاكرة الحرب " عيشوا يوم معنا "

دايما بحاول أواسي حالي بالمقولة اللي بتقول "متخفش من صوت الرصاص.. لأنه الرصاصة اللي حتقتلك مش حتسمع صوتها"..

حلوة هههههههههههه

أنا طول عمري بسمع انه الفسفور في السمك.. وإنه مفيد للشسمو..

ههههههههههههههههههههههههه

فايق وريق يا حاج .. يا ريتك ع طول زي هيك وتفرحني !!

خليك زي هيك ع طول ..

[أبو أُسيد]

رد: من ذاكرة الحرب " عيشوا يوم معنا "

ههههههههههههههههههههههه

طبعا هو حكى بالنيابة عن كل أهل غزة

لأنه الكلام اللي كتبه هو لسان حالنا كلنا




الله لا يعيدها من أيام

[mohamd89]

رد: من ذاكرة الحرب " عيشوا يوم معنا "

جعل الله أيامكم أمناً وسلاما
أسأل الله وافر الخير والمحبة لكم

[صديق الاستشهاديين]

رد: من ذاكرة الحرب " عيشوا يوم معنا "

بس إلا إنه الخوف من انه الطيار أخو الشلن تحلو دارنا في عينه ويمزعنا صاروخ بحجة الغسيل اللي عالسطح بأثر عالزنانات..

الله يقطع شرك
ههههههههههه

[وادي بانشير]

رد: من ذاكرة الحرب " عيشوا يوم معنا "

اول ماصارت الضربه الجويه
قلت هذا طيار مجون ونزل ضرب عشوائي في الشعب

وايضا الي ذكريات مع الشاي الي كنت اشربو الي كان بطعم الكاز لانو كنا نعلمو على البابور

ولا انسى لما كانت الكهربه قاطعه وخبزت على الساج
وبعد ماخلصت امي قالت كل الي خبزتو طلع خبز محروق يعطيك العافيه

[mohamd89]

رد: من ذاكرة الحرب " عيشوا يوم معنا "

ههههههههه
شكلكوا فاكرين شوية منها
إن شاء الله ببدل هالذاكرة بذاكرة أيام انتصار وفرح :(6):

[صديق الاستشهاديين]

رد: من ذاكرة الحرب " عيشوا يوم معنا "

اول ماصارت الضربه الجويه
قلت هذا طيار مجون ونزل ضرب عشوائي في الشعب

وايضا الي ذكريات مع الشاي الي كنت اشربو الي كان بطعم الكاز لانو كنا نعلمو على البابور

ولا انسى لما كانت الكهربه قاطعه وخبزت على الساج
وبعد ماخلصت امي قالت كل الي خبزتو طلع خبز محروق يعطيك العافيه

ههههههههههههههههه
الحال من بعضو
سبحان الله كل البيوت بالحرب
كانت زي بيت واحد
نفس الحال

[ابوحسن]

رد: من ذاكرة الحرب " عيشوا يوم معنا "

أكتر اشي بكيف عليه لما يرن تلفون الدار.. بنصير نتقاتل مين يرد عالتلفون أنا واخواتي.. عشان نحكي مع الناس اللي بتصلوا من الدول العربية..
كل واحد وحظه.. يطلع الإتصال من المغرب.. الجزائر.. مصر.. ليبيا.. السعودية.. السودان.. أو يتخوزق ويطلعله واحد بقولك جيش الدفاع الاسرائيلي..
ويطلع الشب بحزرك انه يكون عندك سلاح.. أو تتعامل مع واحد من المقاومة..
بس اليوم حسيت انه فش إلا تلفونا بكل غزة.. مسكتش وهوة يرن..
- ألو السلام عليكم...
- وعليكم السلام..
- معك فلانة من ليبيا.. الله معكم.. الله ينصركم.. الله يقويكم..
- تسلمي يا حجة.. إدعولنا..
- الله ينصركم ويحفظكم..
- يلا سلام عليكم..
- وعليكم السلام..
هادي عينة من المكالمات اللي بتوصلنا.. مع انها صغيرة وفهاش رغي وطق حنك .. إلا إنها بتحسس الواحد انه مش لحاله وفي حد معاه..
ويا حبيبي لو خلال المكالمة نزل صاروخ ولا الخمسمية تاعت الأباتشي اشتغلت.. شوف العياط على التلفون .. وبدل ما هما يصيروا يواسوك ويهدوا فيك.. احنا بنصير نهدي فيهم ونسكتهم..

يقطع شره من مقال ساخر واقعي قرأته بعد الحرب واحتفظت فيه كمقال للذكرى..

وإن عدنا عادوا.

[فلسطين العز]

رد: من ذاكرة الحرب " عيشوا يوم معنا "

بس هان الوضع مختلف.. فسفور صح بخليك تضوي.. يعني أول ما تيجي عليك قذيفة فسفور.. وتهب فيك النار.. حيصير اللي يشوفك يقولك منور ياحج.. الله يلطف فينا..

ههههههههه

والله فشر عادل امام
واقع مرير بنكهة الضحك لأخير

ربنا يسترها

[المهندس الجهادى]

رد: من ذاكرة الحرب " عيشوا يوم معنا "

أذكر موقف أثر فى جدا فى الحرب , احد جيراننا ممن نحسبهم من المترفين الاغنياء بعض الشئ , حينما جاء ليطلب منا خبزا لتناول وجبة عشاء , فقلت حينها سبحان الذى أجبر هذا على فعل ما يفعله الفقراء !!